22.9.2015
ဝ ပြည်သွေးစည်းညီညွတ်ရေးပါတီ UWSA မှာ ၁၉၈၉ ခုနစ်ကတည်း က မြန်မာအစိုးရနှင့် ငြိမ်းချမ်းရေး ရယူပြီးဖြစ်သဖြင့် နိုင်ငံလုံးဆိုင်ရာ အပစ်ခတ်ရပ်စဲရေး လက်မှတ်ရေးထိုးမှုတွင် ပါဝင်လက်မှတ်ရေးထိုးရန် လိုအပ်သလောဟု ၀ တပ်ဖွဲ့၏ ပေါ်လစ်ဗျူရိုအဖွဲ့ဝင်များက ပန်ဆန်းတွင် ကျင်းပနေသည့် ပေါ်လစ်ဗျူရို အစည်းအဝေးတွင် မေးခွန်းထုတ်ကြောင်း သိရသည်။
စက်တင်ဘာလ ၁၈ ရက်နေ့မှ စတင်ကျင်းပနေသည့် ၀ ပြည်သွေးစည်း ညီညွတ်ရေးပါတီ၏ ပေါ်လစ် ဗျူရိုအဖွဲ့ အစည်းအဝေးမှာ နိုင်ငံလုံးဆိုင်ရာ အပစ်ခတ်ရပ်စဲရေးလက်မှတ်ရေးထိုးမှုတွင် ၀ တပ်ဖွဲ့အနေဖြင့် ပါဝင်ရန် အစိုးရဘက်မှ ကမ်းလှမ်းခဲ့ပြီးနောက်ပိုင်း အဖွဲ့အတွင်း သဘောထား ကို ဆွေးနွေးရန်အတွက် ကျင်းပနေခြင်း ဖြစ်သည်။
“ အခုကျင်းပပြီးစီးသလောက်ကတော့ မူဝါဒပြောင်းဖို့ သိပ်မရှိ ဘူး။ တော်တော် များများကလည်း ဘာကြောင့် ၀ တပ်ဖွဲ့အနေနဲ့ ပါဝင်လက်မှတ်ရေး ထိုးရမှာ လည်း ဆိုတာကိုပဲ မေးခွန်းထုတ်နေ တယ်။ ပြီးတော့ လက်ရှိ နိုင်ငံရေး အခြေနေတွေနဲ့ တခြားတိုင်းရင်းသား အရေးတွေနဲ့ ပတ်သက်လို့လည်း ဒီအစည်းအဝေးမှာ ဆွေးနွေး နေတယ်” ဟု ၀ တပ်ဖွဲ့မှ အမည်မဖော်လိုသူ အရာရှိတဦးက ပြောသည်။
အင်အားအကြီးဆုံး တိုင်းရင်းသား လက်နက်ကိုင်အဖွဲ့ဖြစ်သည့် ၀ ပြည်သွေး စည်း ညီညွတ်ရေးပါတီမှာ နယ်မြေ အကျယ်ပြန့်ဆုံး ထိန်းချုပ်နယ်မြေရှိနေ သည့် အဖွဲ့အစည်းဖြစ်ပြီး ၁၉၈၉ ဗမာပြည်ကွန်မြူနစ်ပါတီမှ ခွဲထွက် လာပြီး ကတည်းက မြန်မာအစိုးရနှင့် ငြိမ်းချမ်းရေး ရယူထားခဲ့ပါသည်။
၂၀၁၃ မှ စတင်ခဲ့သည့် နိုင်ငံလုံးဆိုင်ရာ အပစ်ခတ်ရပ်စဲရေး ဆွေးနွေးပွဲများ တွင် ၀ တပ်ဖွဲ့အနေဖြင့် ဆွေးနွေး သူအနေနှင့် တက်ရောက်ခဲ့ခြင်းမရှိပဲ တစ်ခါတစ်ရံလေ့လာသူအဖြစ်သာ တက်ရောက်နေခဲ့ပါသည်။
“တပ်မတော်ကာကွယ်ရေးဦးစီးချုပ်က ကျနော်တို့ ငြိမ်းချမ်းရေးယူပြီးက တည်းက ပြန်ကြည့်မယ်ဆိုရင် ၃ ယောက် ပြောင်းသွားပြီ ကျနော်တို့နဲ့က တစ်ခါမှ မြန်မာစစ်တပ်နဲ့ တိုက်ဖူးတာ မရှိခဲ့ဘူး။ အဲဒီတော့ ငြိမ်း ချမ်း ရေး ယူပြီးသား အဖွဲ့က အပစ်ခတ်ရပ်စဲရေး ပြန်လုပ်စရာလိုလို့လား စဉ်းစား ကြည့်လေ။ မူလကတည်းကလည်း နိုင်ငံရေးဆွေးနွေးပွဲရောက် ရင်လာ တက်ပါ့မယ် ပြောပြီးသားပဲ” ဟု အဆိုပါ ၀ တပ်ဖွဲ့တာဝန်ရှိသူက ပြောပါ သည်။
နိုင်ငံလုံးဆိုင်ရာ အပစ်ခတ်ရပ်စဲရေး စာချုပ်တွင် ၀ တပ်ဖွဲ့အနေဖြင့် ပါဝင်လက် မှတ်ရေးထိုးမှသာ အပစ်ရပ်ပြီးနောက်ပိုင်းကျင်းပ မည့် နိုင်ငံရေးဆွေးနွေးပွဲ တွင် ၀ တပ်ဖွဲ့ အနေဖြင့် တက်ရောက်ခွင့် ရမည်ဖြစ်ပြီး ၀ အဖွဲ့မှ တောင်းဆို ထားသည့် ၀ ပြည်နယ်အရေးလို ကိစ္စမှာ ယင်းဆွေးနွေးပွဲ တွင် ဆွေးနွေးနိုင် မည် ဖြစ်ကြောင်း စက်တင်ဘာလ ၁၂ ရက်နေ့က ကျိုင်းတုံတွင် ပြု လုပ် သည့် မြန်မာ အစိုးရနှင့် ၀ တပ်ဖွဲ့တာဝန်ရှိ သူများ ဆွေးနွေး မှုတွင် မြန်မာ အစိုးရဘက်မှ ပြောဆိုထားသည်။
စက်တင်ဘာလ ၄ ရက်နေ့က ထုတ်ပြန်ထားသည့် ၀ တပ်ဖွဲ့၏ ထုတ်ပြန်ချက် တွင် ၀ အနေဖြင့် ပါဝင်လက်မှတ် ရေးထိုးမည် မဟုတ်ကြောင်း ထုတ်ပြန် ထားပြီး ကိုးကန့် ၊ တအာင်းပလောင်နှင့် ရခိုင့်တပ်မတော်ကဲ့သို့သော အဖွဲ့များကို အဘယ်ကြောင့် အပစ်ခတ်ရပ်စဲရေး လက်မှတ်ရေးထိုးရာတွင် ပါဝင်ခွင့်မရှိသနည်းဆိုသည်ကိုလည်း မေးခွန်းထုတ်ထားပါသည်။
ပေါ်လစ်ဗျူရိုအစည်းအဝေးမှာ စက်တင်ဘာလ ၂၂ ရက်နေ့တွင် ပြီးစီး မည် ဖြစ်ပြီး အဆိုပါနေ့တွင် ၀ ဥက္ကဌ ဦးပေါက်ယူချန်းထံမှ လမ်းညွှန်မှုများကို ရယူသွားမည်ဖြစ်ကာ ကြေငြာချက်တရပ်ကိုလည်း ထုတ်ပြန်သွားရန် ရှိနေကြောင်း ၀ တပ်ဖွဲ့ တာဝန်ရှိသူထံမှ သိရသည်။
#Panglong(Burmese)
0 comments:
Post a Comment