ပန်းသီး၊ ခရမ်းချဉ်သီးမှာပါတဲ့ ဓါတ်ပေါင်းတွေဟာ ကြွက်သားတွေအတွက် အထောက်အပံ့ဖြစ်စေ

14.9.2015

University of Iowa မှ သုတေသနပညာရှင်တွေဟာ ကြွက်သားတွေကို အိုမင်းရင့်ရော်စေတဲ့ ပရိုတင်းဓါတ်ကိုရှာဖွေတွေ့ရှိခဲ့ပြီး ပန်းသီးနဲ့ခရမ်းချဉ်သီးတို့မှာ ပါဝင်တဲ့ဓါတ်ပေါင်းတွေက ဒီပရိုတင်းအပေါ် ပြန်လည်ချေဖျက်ပေးနိုင်စွမ်း ရှိကြောင်းလေ့လာတွေ့ရှိခဲ့ပါတယ်။

ကြွက်သားအားနည်းရခြင်းနဲ့ ချိနဲ့သေးသိမ်ခြင်းတွေကို အဓိကဖြစ်စေတာကတော့ ဇရာကြောင့်ဖြစ်ပါတယ်။ သုတေသနပြုသူတွေအဆိုအရ ဒီဓါတ်ပေါင်းတွေကိုအသုံးပြုပြီး အသက်အရွယ်ကြောင့် ဖြစ်ပေါ်လာတဲ့ ကြွက်သားအားနည်းခြင်းတွေကို ပြန်လည်သန်စွမ်းလာအောင် အထောက်အကူပြုနိုင်လိမ့်မယ်လို့ ဆိုပါတယ်။

“ ကျွန်တော်တို့ လူတွေတော်တော်များများဟာ အသက်ကြီးလာတာနဲ့အမျှ ကြွက်သားတွေ ချိနဲ့အားနည်းလာတာကို သိကြပါတယ်။ ဒီပြဿနာရဲ့ အဓိကအကြောင်းအရင်းကတော့ ကျွန်တော်တို့ဘ၀နေထိုင်မှုနဲ့ ကျန်းမာရေးအခြေအနေတွေကြောင့်ပဲ ဖြစ်ပါတယ်” လို့ University of Iowa မှ ဆေးဝါးဆိုင်ရာ ပါမောက္ခ Dr. Christopher Adams က ရှင်းလင်းပြောပြထားပါတယ်။

သုတေသနပညာရှင်တွေဟာ ပန်းသီးမှာပါဝင်တဲ့ Ursolic အက်စစ်နဲ့ ခရမ်းချဉ်သီးစိမ်းတွေမှာ ပါဝင်တဲ့ Tomatidine ဓါတ်တွေဟာ ဆာလောင်မွတ်သိပ်မှုနဲ့ လှုပ်ရှားမှုမရှိခြင်းတွေကြောင့် ဖြစ်ပေါ်လာတဲ့ ကြွက်သားအားနည်းမှုတွေကို ကာကွယ်ရာမှာ အကျိုးသက်ရောက်မှုရှိပါသတဲ့။

အသက်အရွယ် ရလာတာနဲ့အမျှ ကြွက်သားတွေ သန်မာအားကောင်းမှု ပိုမိုရရှိစေဖို့ သို့ ထိန်းသိမ်းထားနိုင်ဖို့ ပညာရှင်တွေက အစားအစာ၊ ဖြည့်စွက်အစာတွေ သို့ ဆေးဝါးတွေကနေ ဒီဓါတ်ပေါင်း၂မျိုးလုံးကို ရရှိနိုင်မယ့် နည်းလမ်းတွေကိုရှာဖွေဖော်ထုတ်ဖို့ စီစဉ်လျက်ရှိပါတယ်။

( Michelle )
Ref : Upi