24.9.2015
လာမယ့် နိုဝင်ဘာလ ၈ ရက်နေ့မှာ ကျင်းပမယ့် ပါတီစုံ ရွေးကောက်ပွဲကြီးအတွက် သျှမ်းပြည် နယ် ထဲက ပါတီ အသီးသီးတို့ဟာ ကိုယ်ယှဉ်ပြိုင်မယ့် ဒေသတွင်းမှာ စည်းရုံးရေး ဆင်း နေကြပါတယ် ။ ပါတီတခု နဲ့တခု စည်းရုံးရေး လှုပ်ရှားမှုဟာ မတူညီကြပါဘူး ။ အဲဒီထဲက လားရှိုးခရိုင်အတွက် အမျိုးသား
လွှတ်တော် ကိုယ်စားလှယ် ယှဉ်ပြိုင်မယ့် သျှမ်းတိုင်းရင်းသားများ ဒီမိုကရေစီအဖွဲ့ချုပ်က စိုင်းဝမ်းလျန်းကို သျှမ်းသံတော်ဆင့်က နန်းမွေခေါဝ် က ဆက်သွယ်မေးမြန်း ထားပါတယ် ။
မေး ။ ။ စည်းရုံးရေးခရီးစဉ် ဘယ်အထိ ရောက်ပြီလဲရှင့် ။
ဖြေ ။ ။ ဟုတ်ကဲ့ ကျနော်တို့ စည်းရုံးရေးခရီးကို စစ်ကြောင်း ၄ ကြောင်းနဲ့ ချီတက်ပါတယ် ။ လားရှိုးမြို့နယ်
မိုင်းယော်တိုက်နယ် ဘက်ကိုတကြောင်း ၊ နမ့်ပေါင်ဘက်ကို တကြောင်း ၊ လားရှိုးမြို့တွင်းဆိုရင် အီနိုင်း
ဘက်ကိုတကြောင်း ၊ နောင်မွန်ဘက်ကို တကြောင်းသွားတယ် ။ မကြာခင် ပြီးစီးတော့မယ် ။
မေး ။ ။ စည်းရုံးရေးမှာ လူထုကိုဘယ်လို ဟောပြောစည်းရုံး ခဲ့ပါသလဲ ။
ဖြေ ။ ။ SNLD ကိုမဲထည့်ပေးပါ ဘာညာ မပြောဘူး ။ ကျားခေါင်းဟာ ပင်လုံစိတ်ဓါတ် အတိုင်းသွားတယ် ။ ဗိုလ်ချုပ်အောင်ဆန်းတို့ လုပ်လာခဲ့တဲ့ တောင်တန်းပြည်မ ပူးပေါင်းရေး မှာ တန်းတူညီမျှမှု လိုချင်တယ်ဆိုတာ နှစ်ပေါင်း ၆၀ ကျော်ရှိပြီ မရသေးဘူး ။ တခုမှ မခံစား ရသေးဘူး ။ အဲတာကို ကြိုးစားချင်
တယ် ။ သျှမ်းပြည်သားတွေ ဒီနေ့အထိ လူ့အခွင့်အရေး ချိုးဖောက်ခံနေရဆဲဖြစ်တယ် ။ အဲတာကြောင့် ကျားခေါင်းပါတီဟာ ရွေးကောက်ပွဲမှာ ဝင်ရောက်ယှဉ်ပြိုင်ပြီးတော့ အနိုင်ရရင် လွှတ်တော်ထဲဝင်ပြီး ၂၀၀၈ ဖွဲ့စည်းပုံကိုပြင်မယ် ။ ပြီးတော့ တန်းတူညီမျှဖို့အတွက် နည်းလမ်းရှာပြီး ဖြေရှင်းပေးမယ် စသဖြင့်ဟောပြောခဲ့တယ် ။
မေး ။ ။ လူထုက ဘာပြောလဲ ။
ဖြေ ။ ။ ဘယ်ပါတီမှ ဒီလိုမျိုး တန်းတူညီမျှမှု လာမပြောပြဖူးဘူး ၊ အခုလိုလာပြောပြတော့ နားလည်သွားပြီ - လို့ ပြန်ပြောပါတယ် ။ တချို့ကလည်း သျှမ်းပါတီတွေ များတယ် ။ ဘာကြောင့်လဲ - လို့မေးတယ် ။ လူထုရော သံဃာတွေရော သျှမ်းပါတီတွေ ပေါင်းစည်းဖို့ တိုက်တွန်းတယ် ။ ကျနော်တို့ဘက်က ပြန်ဖြေပေးပါတယ် ။ သျှမ်းပါတီတွေပေါင်း စည်းနိုင်ဖို့ ကျနော်တို့ကြိုးစားနေပါတယ် ။ ခုလောလောဆယ်တော့ ရွေးကောက်ပွဲက နီးနေပြီဆိုတော့ အချိန်က မရှိတော့ဘူး ။ ဒါကြောင့် ပြည်သူများ တောင်းဆိုချက်ကို ၂၀၁၅ ပြီးမှဘဲ စီစဉ်နိုင် တော့ မယ်လို့ ကျနော်တို့ပြောပါ တယ် ။
လောလောဆယ် သျှမ်းပါတီ ၂ ခုရဲ့ ရည်မှန်းချက် တွေကိုလည်း ရှင်းပြပါတယ် ။ သျှမ်းပါတီတခုကတော့ သျှမ်းပြည်နယ်အစိုးရ ဖြစ်ချင်တယ် ။ ကျနော်တို့ပါတီကတော့ တန်းတူညီမျှမှုအတွက်လုပ်ဖို့ ရည်ရွယ်ပါတယ် - ဆိုတဲ့ဟာ လူထုက နားလည်အောင်ရှင်းပြ ပါတယ် ။ ဒါကြောင့် ဒီရွေးကောက်ပွဲမှာတော့ မိဘပြည် သူများ မဲထည့်ပေးတော့မယ်ဆိုရင် နားလည် အောင်ကြည့်ပြီးမဲပေးဖို့ တိုက်တွန်းတယ် ။
မေး ။ ။ စည်းရုံးရေးခရီးစဉ်မှာ အခက်အခဲ ရှိပါသလား ။
ဖြေ ။ ။ မရှိပါဘူး ။ ကော်မရှင်ဆီကို စာတင်တယ် ။ ခွင့်ပြုပေးမှကျနော်တို့ ဆင်းရတယ် ။ ဒါပေမယ့်ကျနော်တို့က ရွာသားတွေအလုပ်နားချိန် ည ပိုင်းကျမှတွေ့တဲ့ အတွက်အဆင်ပြေ ပါတယ် ။
မေး ။ ။ လက်နက်ကိုင် အဖွဲ့အစည်းတွေရော ။
ဖြေ ။ ။ မရှိပါဘူး ။ အစိုးရရဲ့ ရဲ ၊ စစ်တပ်ဘက်ကတော့ ကျနော်တို့ဘက်က လူဘယ်နှစ်ဦး လာတယ် အဲလောက်ဘဲ မေးပါတယ် ။ ယူနီဖောင်းတွေ ဘာတွေဝတ်ပြီးမေးလား စစ်လား တော့ မရှိပါဘူး ။
မေး ။ ။ အသုံးစရိတ်တွေကော် လုံလောက်ပါသလား။ အခက်အခဲရှိလား ။
ဖြေ ။ ။ အခု ကျနော်တို့ကတော့ ကိုယ့်မြို့နဲ့ကိုယ်ပေါ့နော် ။ ကိုယ့်နည်းကိုယ့်ဟန်နဲ့ ရှာဖွေရတယ် ။ ကျနော်တို့လားရှိုးဒေသခံတွေ အတွက်တော့ ပါတီထဲက ဦးဆောင်ဦးရွက်ပြုတဲ့ လူကြီးတွေ မြို့နယ် ကော်မတီတွေက နေ မြို့ထဲဆင်းပြီးတော့ ကျနော်တို့ပါတီကို ထောက်ခံအားပေးတဲ့ ဒေသခံတွေဆီကနေ
အလှူခံပေးရာကနေ ရလာတဲ့ ငွေကြေးတွေကို သုံးပါတယ် ။ ကားရှိတဲ့သူတွေ ဆိုရင်လည်း ကိုယ့်ဆီ နဲ့ကိုယ်သွားပြီး စည်းရုံးရေး ဆင်းကြတယ် ။ တချို့ရပ်ရွာတွေထဲဆင်းရင် ကျေးလက်မိဘတွေက ပါတီစည်းရုံးရေးလုပ်ငန်းမှာ ကိုယ်တိုင် ဝင်ရောက်ကူညီနိုင်ခြင်း မရှိတာကြောင့် ငွေကြေးထောက်ပံ့ချင်တယ် ။ ၅၀၀ ကျပ် ၁၀၀၀ ကျပ် ဘဲရှိတယ် ။ ထောက်ပံ့လို့ရမလား ဆိုတာလည်း ရှိလာတယ်နော်။ အဲတာတွေကလည်း ကျနော်တို့စည်းရုံးရေး လုပ်ငန်းအတွက် ရံပုံငွေ အထောက်အပံ့တခုဖြစ်စေပါတယ် ။ ပြီးတော့ ကျနော်တို့ ပါတီ
ဘက်ကလည်း အလှူငွေရရှိကြောင်း ဖြတ်ပိုင်း ပြန်ပေးပါတယ် ။
မေး ။ ။ အဲလိုမျိုး မိဘပြည်သူဆီက အလှူငွေတွေယူတော့ စည်းရုံးရေး လုပ်ငန်းအတွက် ထိခိုက်အနှောင့်အယှက် ဖြစ်စေသလား ။
ဖြေ ။ ။ ကျနော်တို့ဘက်က လှူပေးဖို့မတိုက်တွန်းသလို ဖိအားလည်း မပေးပါဘူး ။ လာရောက်နား ထောင် သူ တွေထဲက စေတနာ သဒ္ဓါအလျောက်လာရောက် လှူဒါန်းနဲ့သူတွေကိုဘဲ ဖြတ်ပိုင်းပေးတာပါ ။
မေး ။ ။ လားရှိုးမြို့မှာ အမျိုးသားလွှတ်တော်အတွက် ဝင်ပြိုင်မှာက ဘယ်နှစ်ယောက်ရှိလဲ ။
ဖြေ ။ ။ ကျနော်တို့က ၅ ယောက်ရှိပါတယ် ။ ကျားဖြူပါတီက ဦးစိုင်းစံမင်းပါ ။ ကြံ့ခိုင်ရေး ပါတီက
နန်းကိန်ဖောင်းတစ်ပါ ။ အမျိုးသားဒီမိုကရေစီအဖွဲ့ချုပ်က ဦးသန်းဌေး ၊ တသီး ပုဂ္ဂလကတော့ ကိုးကန့်
အမျိုးသားလို့ပြောပါတယ် ။ နောက်ကျားခေါင်းပါတီက ကျတော့ ကျနော် စိုင်းဝမ်းလျန်းပေါ့နော်။ ကျနော်တို့
အခု လားရှိုးမှာစည်းရုံးရေးဆင်းနေတာ ပြီးတော့ မယ် ။ ပြီးရင် လားရှိုးခရိုင်ထဲပါဝင်တဲ့ ကွန်လုံ ၊ သိန္နီ ၊ မိုင်းရယ် ၊ တန့်ယန်း ဘက်ကိုသွားမယ်။ဖြေကြားပေးတဲ့ အတွက် သျှမ်းသံတော်ဆင့်မှ ကျေးဇူးတင်ပါတယ် ။
စိုင်းဝမ်းလျန်းခေါ် စိုင်းလိန်ဟာ အဖ စိုင်းယွတ်ခမ်းဆေထဲင် ၊ အမိ နန်းနှင်းစိန် တို့မှ ၁၉၈၁ ခု သိန္နီမြို့
ဥယျာဉ်မှူး အုပ်စု ဝမ့်နောင်မှာ မွေဖွားခဲ့ပါတယ် ။ အထက်တန်းပညာကို ၁၉၉၈-၉၉ မှာ သိန္နီမြို့မှာ
အောင်မြင်ပြီး လားရှိုးတက္ကသိုလ်မှာ သမိုင်းဘာသာရပ်ကို ဆည်းဖူးခဲ့ပါတယ် ။ ၂၀၀၄ ခုနှစ်မှာ နန်းခမ်းစံ
နဲ့ အိမ်ထောင်ပြုပြီးတော့ သားသမီး နှစ်ယောက်ထွန်း ကားခဲ့ပါတယ် ။ အဲဒီနှစ်မှာဘဲ သျှမ်းအတိုင်အပင်ခံ
ကောင်စီ ဖွဲ့စည်းရေးဆွေးနွေးပွဲမှာ အစည်းအဝေး မှတ်တမ်းပြုသူအဖြစ်ဆောင်ရွက်ရာမှ နိုင်ငံရေးနဲ့ စတင်နီးစပ်လာခဲ့ပါတယ် ။ဒါ့အပြင် လူမှုအဖွဲ့အစည်းဖွံ့ဖြိုး တိုးတက်ရေး ၊ သဘာဝပတ်ဝန်းကျင် ကာကွယ်
စောင့်ရှောက်ရေး ၊ မူးယစ်ဆေးဝါးနှင့် ကင်းဝေး စေရေးအတွက် လူငယ်တွေကို ဦးဆောင်ပြီးတော့ တောင်တက်ခရီးလှုပ်ရှားမှု အစီအစဉ် စတင်ခဲ့သူလည်း ဖြစ်ပါတယ် ။ မိသားစုစီးပွားရေးအဖြစ် ဂျာနယ် ၊ စာအုပ်
အရောင်းဆိုင် ဖွင့်လှစ်ကာ ဝါသနာအရ ကဗျာ ၊ စာပေများ ရေးသားထုတ်ဝေခဲ့ပါတယ် ။
#သျှမ်းသံတော်ဆင့်
0 comments:
Post a Comment